Click on a word to bring up parses, dictionary entries, and frequency statistics
51.
[190]
tum Brutus: Quid tu, inquit, quaeris alios?
de te ipso nonne quid optarent rei, quid ipse Hortensius
iudicaret videbamus? qui cum partiretur tecum causas,—
saepe enim interfui—perorandi locum, ubi plurimum pollet
oratio, semper tibi relinquebat. Faciebat ille quidem, inquam, et mihi benevolentia, credo, ductus tribuebat omnia.
Sed ego quae de me populi sit opinio nescio; de reliquis
hoc adfirmo, qui vulgi opinione disertissimi habiti sint,
eosdem intellegentium quoque iudicio fuisse probatissimos.
[191]
nec enim posset idem Demosthenes dicere quod dixisse
Antimachum clarum poetam ferunt: qui cum convocatis
auditoribus legeret eis magnum illud quod novistis volumen
suum et eum legentem omnes praeter Platonem reliquissent, Legam, inquit, nihilo minus: Plato enim mihi unus
instar est centum milium1. Et recte; poema enim reconditum paucorum adprobationem, oratio popularis adsensum
vulgi debet movere2. At si eundem hunc Platonem unum
auditorem haberet Demosthenes, cum esset relictus a ceteris,
verbum facere non posset.
[192]
quid tu, Brute, posses, si te ut3
Curionem quondam contio reliquisset? Ego vero, inquit
ille, ut me tibi indicem, in eis etiam causis, in quibus omnis
res nobis cum iudicibus est, non cum populo, tamen si a
corona relictus sim, non queam dicere. Ita se, inquam, res
habet. Vt, si tibiae inflatae non referant sonum, abiciendas
[p. 1056]
eas sibi tibicen putet, sic oratori populi aures tamquam tibiae
sunt; eae si inflatum non recipiunt—aut si auditor omnino
tamquam equus non facit, agitandi finis faciendus est.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.